Fjallar um breytingar á Listasafninu á Akureyri
Arkitektinn Steinþór Kári Kárason verður með þriðjudagsfyrirlestur í Ketilhúsinu í dag, 31. október kl. 17-17.40, sem hann nefnir Endurmótun. Í fyrirlestrinum fjallar Steinþór Kári um endurmótun Listasafnsins á Akureyri, þær hugmyndir sem þar liggja að baki, markmið og sýn hans sem arkitekts á þessar breytingar. Hann mun sýna myndir og teikningar af breytingunum ásamt öðrum verkum sem hann hefur unnið.
Steinþór Kári útskrifaðist sem arkitekt úr École Polytechnique Féderale de Lausanne í Sviss 1998. Eftir að hafa starfað hjá Studio Granda 1998-2003 og hjá Tony Fretton Architects í London 2003-2004 stofnaði hann ásamt Ásmundi Hrafni Sturlusyni Kurtogpi 2004 og hefur starfað þar síðan. Hann hefur kennt arkitektúr við Listaháskóla Íslands frá 2002 og verið prófessor við skólann frá 2010 auk þess að sitja í ýmsum ráðum, nefndum og stjórnum á vegum hins opinbera, félagasamtaka og stofnana.
Þriðjudagsfyrirlestrarnir í vetur eru samvinnuverkefni Listasafnsins á Akureyri, Myndlistaskólans á Akureyri, Gilfélagsins, Verkmenntaskólans á Akureyri, Myndlistarfélagsins og Háskólans á Akureyri.
Aðgangur er ókeypis.