Ekki lengur týnd
Akureyringurinn Svanfríður Oddsdóttir var, eins og svo fjölmargir aðrir, hreint ekki viss um hvað hún ætlaði að verða þegar hún yrði stór. Hún innritaði sig á sínum tíma í MA og lauk þar tveimur árum í félagsfræðideild en fannst hún einhvern veginn ekki vera alveg á réttum stað, bóknám hentaði henni ekki. Undir niðri blundaði sú þrá að læra að rækta það sem hún hafði haft yndi af frá því hún var lítil stelpa, að teikna. Hún færði sig því upp á Eyrarlandsholtið og skráði sig á listnámsbraut VMA. Og þá fann hún sína fjöl.
„Ég er mjög ánægð með það sem ég er að fást við í dag og mér hefur aldrei fundist eins gaman í skóla og nú. Núna er ég að gera nákvæmlega það sem mig hefur langar til þess að gera. Þetta er annar veturinn minn hér í VMA og að óbreyttu mun ég útskrifast sem stúdent af listnámsbraut um næstu jól,“ segi Svanfríður.
„Ég er mjög sátt við listnámsbrautina. Kennararnir, sem margir eru jafnframt skapandi listamenn, vita nákvæmlega hvað þeir eru að gera . Þeir hjálpa nemendum að finna sínar leiðir í listsköpuninni og það finnst mér frábært. Þeir mánuðir sem ég hef verið hér í skólanum hafa hjálpað mér að leggja línur um framtíðina. Ég var alveg týnd og vissi ekkert hvað ég ætlaði að taka mér fyrir hendur en núna hefur framtíðin tekið á sig mynd í mínum huga. Ég hef áhuga á að læra gullsmíði erlendis og þá langar mig til þess að kynna mér betur húðflúrshönnun, sem ég hef aðeins fengist við.“
Á vegg mót austurinngangi VMA hanga þessa dagana uppi tvær akrílmyndir sem Svanfríður gerði á haustönn. Aðra kallar hún „Sjálfseyðing“ og hina „Hugleiðsla“. Eins og sjá má eru þessar myndir að töluverðu leyti áþekkar. Svanfríður segir að i myndunum sé hún m.a. að kalla fram það hugarástand þegar manneskjan leggur mikið á sig og er í raun að pína sig áfram. Hún vísar til þess að sjálf hafi hún lengi tekist á við kvíða, í raun alveg frá því hún var lítil stelpa. „Ég tengi mig sjálfa við þessar myndir. Ég er ófeimin að ræða opinskátt um að ég hef lengi glímt við kvíða. Segja má að ég sé nýlega búin að viðurkenna þetta fyrir sjálfri mér og er farin að taka reglulega lyf sem hjálpa mér mikið, mér hefur aldrei liðið jafn vel. Þessar myndir málaði ég ekki löngu eftir að ég byrjaði að taka lyf reglulega á síðasta ári. Innst inni var ég á móti því að taka kvíðastillandi lyf en strax og ég viðurkenndi þetta fyrir sjálfri mér, þá var þetta allt í lagi og ég hvet alla sem eiga við eitthvað slíkt að stríða að leita sér aðstoðar. Vellíðan skiptir öllu máli og að vera í góðu jafnvægi,“ segir Svanfríður Oddsdóttir.