Akrílmálverkið heillar
Nemendur sem komnir eru langt í námi sínu í myndlist á listnáms- og hönnunarbraut sitja áfanga þar sem þeir læra og þjálfast í að vinna málverk með akríllitum. Á þessari önn kennir Björg Eiríksdóttir nemendum þennan áfanga og er gaman að sjá hversu ólík og fjölbreytt myndefni nemendu eru – landslag og abstrakt og allt þar á milli.
Það fór ekkert á milli mála, er litið var inn í tíma til nemenda í akrílmálun, að þeir nutu hverrar mínútu og þeir fóru ekki leynt með að þetta væri áhugavert listform.
Nemendur velja sér viðfangsefni sem þeir sækja í umhverfið – undirbúa, rannsaka, kynna sér sköpunarferli listamanna og málverk þeirra og vinna síðan verk á sínum forsendum. Útkoman er skemmtileg, eins og hér má sjá.
Eins og komið hefur fram var sl. laugardag opnuð sýning á lokaverkefnum útskriftarnema í Listasafninu á Akureyri og verður sýningin opin til 1. desember nk. kl. 12-17 alla daga. Nokkrir útskriftarnemanna eru líka í þessum akrílmálunaráfanga.