VMA á aðild að samningi um Virkið
VMA á aðild að samningi sem var ritað undir í gær í Ungmennahúsinu Rósenborg um þverfaglegt samstarf aðila á Akureyri og Eyjafjarðarsvæðinu sem sinna málefnum ungs fólks á aldrinum 16-29 ára.
Þetta verkefni gengur undir heitinu „Virkið“ og er því ætlað að vera vettvangur um samstarf þegar þessi hópur fólks þarf, stöðu sinnar vegna, á þjónustu að halda. Þjónustu sem snýr m.a. að atvinnuleit, skólagöngu, endurhæfingu eða annarri meðferð.
Svava Hrönn Magnúsdóttir, námsráðgjafi í VMA, segir nafn verkefnisins vísa til þess að því sé ætlað að stuðla að virkni ungs fólks í samfélaginu. Með þessum samningi sé fest á blað með formlegum hætti hvernig brugðist skuli við ef t.d. nemendur hætti námi, hvernig þá sé unnt að vísa þeim veginn til virkni á öðrum vettvangi. Að sama skapi sé verkefninu ætlað að vísa ungu fólki veginn inn í skólakerfið, hyggist það innrita sig til náms. Svava Hrönn segir að fram hafi komið við undirritun samningsins að slíkt formlegt samstarf ólíkra aðila sé ekki til staðar hér á landi og horft verði til þess í mögulegu slíku samstarfi á höfuðborgarsvæðinu. „Að mínu mati er mjög jákvætt að þessi samningur sé orðinn að veruleika og þessi mál komin í formlegan og fastan farveg,“ segir Svava Hrönn.
Eftirtaldir aðilar standa að samkomulaginu auk VMA: Vinnumálastofnun Norðurlands eystra, Akureyrarbær (fjölskyldusvið og Ungmennahúsið - Rósenborg), Fjölsmiðjan á Akureyri, Sjúkrahúsið á Akureyri (geðdeild og BUG teymið), Heilbrigðisstofnun Norðurlands (Heilsugæslan), Virk, Menntaskólinn á Akureyri, Símenntunarmiðstöð Eyjafjarðar, Grófin geðverndarmiðstöð og Starfsendurhæfing Norðurlands.
Meginmarkmið þessa samstarfs er að:
- stuðla að bættri almennri þjónustu fyrir ungt fólk á aldrinum 16–29 ára
- stuðla að bættri sérhæfðri þjónustu fyrir fólk á aldrinum 16–29 ára
- efla þverfaglegt samstarf fagaðila stofnananna til hagsbóta fyrir hópinn.