Bréf til bjargar lífi - mannréttindi skipta máli
Því fleiri undirskriftir og raddir, því meiri líkur eru til þess að stjórnvöld í viðkomandi löndum láti lausa samviskufanga sem sumir hafa verið í fangelsum árum saman án dóms og laga. Þetta voru skilaboð Þórkötlu Haraldsdóttur, sjálfboðaliða Amnesty International á Íslandi, þegar hún ávarpaði nemendur í VMA í Gryfjunni sl. þriðjudag. Þórkatla hefur verið virkur sjálfboðaliði samtakanna síðustu fjögur ár og setið í ungliðahreyfingu samtakanna. Hún kynnti fyrir nemendum VMA átakið Bréf til bjargar lífi sem er alheimsátak og gengur út á að fá fólk til þess að skrifa nöfn sín undir áskorun til stjórnvalda um allan heim til þess að leysa úr haldi samviskufanga. Þórkatla hvatti nemendur í VMA til þess að leggja sitt af mörkum til þess að efla mannréttindi í heiminum og skrifa nöfn sín inn á heimasíðu Amnesty International. Um leið er þetta landskeppni framhaldsskólanna. Annars vegar er keppt um hvaða framhaldsskóli skráir flesta nemendur og hins vegar hvaða skóli skráir hlutfallslega flesta miðað við fjölda nemenda í skólanum. Þetta er árleg keppni og voru Menntaskólinn í Reykjavík og Framhaldsskóli Austur-Skaftafellssýslu á Höfn efstir á blaði á síðasta ári.
Þórkatla Haraldsdóttir tók fyrsta árið sitt í framhaldsskóla í VMA veturinn 2013-2014. Hún fór síðan suður yfir heiðar og fór á leiklistarbraut Fjölbrautaskólans í Garðabæ og lauk náminu sl. vor. Nú er hún komin aftur norður og er á fyrsta ári í sálfræðinámi í Háskólanum á Akureyri. Hún segist á sínum tíma hafa starfað í Ungmennaráði Akureyrar og í framhaldinu hafi hún eftir krókaleiðum farið að starfa sem sjálfboðaliði fyrir Amnesty International á Íslandi þegar hún flutti suður til náms. Hún segir að starf sjálfboðaliðans sé fjölbreytt, felist m.a. í því að safna undirskriftum í átakinu Bréf til bjargar lífi, vinna að jafningjafræðslu, fræða fólk um starfsemi Amnesty og efla umræðu um mannréttindamál.
Í Gryfjunni hitti Þórkatla m.a. fyrir frænku sína, Elísabethu Ásu Heimisdóttur, nemenda í VMA og kynningarstjóra Þórdunu. Elísabeth segist eins og Þórkatla frænka hennar lengi hafa haft áhuga á og fylgst með mannréttindamálum í heiminum. Þetta sé mikilvægt málefni sem varði alla, unga sem aldna.