Brautskráning í Hofi í dag
Í dag kl. 17 verður brautskráning 169 nemenda frá Verkmenntaskólanum á Akureyri í Menningarhúsinu Hofi. Gert er ráð fyrir að brautskráningin taki um tvær klukkustundir.
Brautskráningin verður í Hamraborg, stóra salnum í Hofi, og verður unnt að tryggja þremur gestum sæti á hvern útskriftarnema, en auk þess geta þeir sem vilja fylgst með brautskráningunni á tjaldi í Hömrum, minni salnum í Hofi, sem rúmar um 300 manns.
Sem fyrr segir verða 169 nemendur brautskráðir með 192 skírteini, en töluverður fjöldi
útskrifast með iðn- eða starfsnám ásamt stúdentsprófi. Brautskráðir verða 108 stúdentar af félagsfræða-, náttúrufræða-,
listnámsbraut- og viðskipta- og hagfræðibraut. Einnig verða brautskráðir 38
iðnnemar, þar af 3 kjötiðnaðarmenn, 3 matartæknar, 6 bifvélavirkjar, 10 húsasmiðir, 2 húsgagnasmiðir, 5 rafvirkjar og 9
stálsmiðir. Brautskráðir verða 9 sjúkraliðar og 8 af starfsbraut.
Þá verða brautskráðir 13 vélstjórar og 14 meistarar, sem hafa tekið sitt nám að stærstum hluta í gegnum fjarnám.