Boðið upp á nám í rafvirkjun fyrir vélfræðinga á vorönn 2022
Á vorönn 2022 býður VMA upp á nám í rafvirkjun fyrir vélfræðinga. Um er að ræða dreifnám, þ.e. kennsla verður bæði í námslotum og fjarnámi. Kennsla hefst í janúar 2022.
Þetta nám hefur áður verið í boði í VMA, síðasti námshópur (12 nemendur) brautskráðist sl. vor.
Inntökuskilyrði er að hafa lokið D-réttindum vélstjórnar.
Námið tekur fjórar annir í skóla auk samningstíma og sveinsprófs til þess að öðlast starfsréttindi í rafvirkjun.
Í vélstjórnarnámi sínu í VMA taka nemendur á annan tug áfanga sem á einn eða annan hátt tengjast rafmagni. Vélfræðingar hafa því lokið fjölda eininga upp í fullgilt nám rafvirkja.
Það segir sína sögu að rafvirkjun er þriggja ára nám í skóla auk starfsþjálfunar en rafvirkjanámið sem VMA býður upp á fyrir vélfræðinga er, sem fyrr segir, fjórar annir. Í raun þurfa vélfræðingar einungis að bæta við sig átta áföngum í rafvirkjun til þess að ljúka skólanáminu í faginu.
Hægt er að sækja um þetta nám á vef Menntamálastofnunar. Sjá hér.