Að skapa sjónrænt tungumál
Bandaríska myndlistarkonan Jessica Tawczynski verður með þriðjudagsfyrirlestur í Ketilhúsinu í dag, 14. nóvember kl. 17-17.40, þar sem hún fjallar um nálgun sína í listinni og hvernig hún hefur skapað sitt eigið sjónræna tungumál. Þetta verður síðasti þriðjudagsfyrirlestur þessa árs í Ketilhúsinu en þráðurinn verður tekinn upp að nýju eftir áramót.
Jessica Tawczynski lauk BFA námi í UMass Lowell og mastersnámi í listum frá MassArt. Hún hefur tekið þátt í fjölda sýninga s.s. Boston Young Contemporaries 2017, High Rock Tower í New York, Wareham Street Studios í Boston og Shenkar College í Tel Aviv í Ísrael. Tawczynski er listamaður nóvembermánaðar í gestavinnustofu Gilfélagsins.
Þriðjudagsfyrirlestrarnir í vetur eru samvinnuverkefni Listasafnsins á Akureyri, Myndlistaskólans á Akureyri, Gilfélagsins, Verkmenntaskólans á Akureyri, Myndlistarfélagsins og Háskólans á Akureyri.
Aðgangur er ókeypis.