Að ljúka listnámi - á leið í lýðháskóla í Danmörku
Maj-Britt Anna Bjarkardóttir fór á listnámsbraut í VMA í ársbyrjun 2015 en hafði áður verið í tvö ár í MA. Fór fyrst á textíllínu en færði sig yfir á myndlistarlínuna. Hún segir að námið hafi verið í senn krefjandi og skemmtilegt og það komi sér skemmtilega á óvart hvernig það hafi opnað augu sín fyrir ýmsu í hinu daglega lífi. Hún horfi á sitt nánasta umhverfi – náttúru og mannvirki – með öðru augum en áður. „Mér hefur fundist stór kostur við námið hér að það er fjölbreytt og gefur innsýn í myndlist og listsköpun af ýmsum toga,“ segir Maj-Britt.
Maj-Britt fæddist á Akureyri en ólst upp í Mosfellsbæ en ákvað að fara norður í framhaldsskóla og var á heimavistinni þau tvö ár sem hún var í MA. Nú er hún búsett á Akureyri og segist kunna því vel. Þrátt fyrir að kunna vel við námið í VMA og skólann segir hún þó góða tilfinningu að sjá fyrir endann á náminu. Hún segist ekki ráðin í því hvort hún fari í listnám á háskólastigi í framhaldinu en á þessari stundu sé ljóst að til að byrja með fari hún á lýðháskóla í Danmörku - nánar tiltekið í Testrup í Mårslet – skammt sunnan við Árósa – frá og með næstu áramótum. Þar segist Maj-Britt taka m.a. myndlistaráfanga. „Ég sótti um nokkra lýðháskóla í Danmörku. Testrup heillaði mig, bæði vegna námsins sem boðið er upp á og einnig er staðsetningin góð, skammt frá Árósum,“ segir Maj-Britt. „Ég ætla mér að vinna í sumar og fram að áramótum og safna mér pening fyrir námsdvölinni í Testrup.“
Í lokaverkefni sínu á listnáms- og hönnunarbraut gerði Maj-Britt skúlptúr sem hún kallar Gulldrenginn. Hér má sjá skólasystur Maj-Britt við Gulldrenginn á útskriftarsýningu nemenda á listnáms- og hönnunarbraut í Ketilhúsinu.
Hér má sjá akrílverk Maj-Britt sem er núna upp á vegg við austurinngang VMA.