Á leið á Íslendingaþorrablót í Chicago
Seinnipartinn í dag fer Ari Hallgrímsson, matreiðslumeistari og brautarstjóri matvælabrautar VMA, til Chicago í Bandaríkjunum í þeim erindagjörðum að útbúa matinn á þorrablót sem verður nk. laugardagskvöld á vegum Íslendingafélagsins þar í borg. Frá árinu 2016 hefur Ari séð um þetta þorrablót Íslendingafélagsins í Chicago að sl. vetri undanskildum. Systir Ara og mágur, Lena Hallgrímsdóttir og Einar Steinsson, hafa lengi búið í Chicago og er Einar formaður Íslendingafélagsins.
Á íslenskan mælikvarða er blótið ekki stórt, Ari reiknar með í kringum sjötíu manns. Þar af er gert ráð fyrir að um 30% gesta verði Íslendingar búsettir í Chicago, um 60% gesta Vestur-Íslendingar og 10% sérlegir Íslandsvinir sem láta ekki íslenskt þorrablót fram hjá sér fara. Eins og undanfarin ár fer blótið fram í Sænska safninu svokallaða en þar er gallerí og húsnæðið er einnig leigt út fyrir veislur. Um tónlistina á blótinu sér Hermann Arason sem einnig býr á Akureyri og fer vestur núna í vikunni.
Ari segir að það sé ekki stórmál að fara með þennan rammíslenska þorramat vestur. Honum sé einfaldlega komið fyrir í tveimur stórum ferðatöskum og aldrei hafi það komið fyrir að tollararnir í Bandaríkjunum hafi skoðað innihaldið – kannski sem betur fer! Það eina sem þurfi að passa vel sé að útfylla alla tollapappíra mjög nákvæmlega og þá geri tollayfirvöld engar athugasemdir. Ari sagðist minnast þess að einu sinni hafi tollvörður í Chicago spurt hann út í innihaldið og þá hafi hann m.a. sagt frá sviðahausunum. Tollarinn hafi verið hæstánægður með það, slíkan mat hefði hann prófað og dásamaði í bak og fyrir. Hann opnaði tollhliðið fyrir Ara undir eins!
Á matseðlinum á þorrablótinu í ár verður klassískur þorramatur eins og hangikjöt, sviðasulta – ný og súr, hrútspungar, svið, harðfiskur og hákarl. Að sjálfsögðu verður einnig boðið upp á staup af íslensku brennivíni. Auk þess segist Ari ætla að bjóða m.a. upp á grafinn lax, roastbeef og pottrétt. Og ekki má gleyma tvíreykta hangikjötinu sem hann segist hafa áður boðið upp á og það hafi slegið í gegn.
Árið 2016 var mikið við haft á þorrablótinu í Chicago því það var haldið í tengslum við upphaf á áætlunarflugi Icelandair milli Keflavíkur og Chicago. Af því tilefni var Geir H. Haarde, sendiherra Íslands í Washington, boðið á blótið. Þessar myndir voru teknar við það tækifæri og einnig á blótinu 2017.