Á bak við málverk
Eins og undanfarin ár er efnt til fyrirlestra í vetur á þriðjudagseftirmiðdögum í Listasafninu á Akureyri. Fyrirlestraröðin er samvinnuverkefni Listasafnsins á Akureyri, VMA, Gilfélagsins, Myndlistarfélagsins og Háskólans á Akureyri.
Guðbjörg Þóra Stefánsdóttir, fyrrv. nemandi á listnámsbraut VMA, reið á vaðið með fyrsta fyrirlestur vetrarins í síðustu viku en í dag, þriðjudaginn 8. október kl. 17-17.40, er komið að Halldóru Helgadóttur myndlistarkonu. Fyrirlestur hennar ber yfirskriftina Á bak við málverk og mun hún í honum fjalla um feril sinn í myndlistinni og einstaka verk.
Halldóra Helgadóttir (f. 1949) lauk námi í málaradeild Myndlistaskólans á Akureyri árið 2000 og hefur síðan haldið fjölda einkasýninga og tekið þátt í samsýningum hér á landi og erlendis.