Skólareglur

Skólareglur VMA

• Nemendum ber að ganga vel um húsnæði skólans og lóð.
• Neysla matar og drykkjar í kennslustofum er óheimil nema í samráði við kennara. Þó er vatn á brúsum undanskilið þar sem aðstæður leyfa.
• Nemendum ber að fara vel með þá muni sem þeir fá að láni í tengslum við kennslu eða aðra starfsemi í skólanum. Lán á eignum skólans þarf að vera með samþykki kennara eða annarra starfsmanna þegar það á við. Öllum hlutum ber að skila í sama ástandi og þeir voru innan tiltekins tíma. Spjöll sem nemendur kunna að vinna á húsnæði skólans eða eigum hans skulu þeir bæta að fullu.
• Nemendum ber að sýna nærgætni og gæta virðingar í allri framkomu sinni. Hverskonar trúarlegur eða pólitískur áróður er óheimill í húsnæði og á lóð skólans.
• Reykingar og öll notkun tóbaks, þ.m.t. nef- og munntóbaks auk rafsígaretta og nikótínpúða, er óheimil í húsnæði og á lóð skólans sem og notkun áfengis og annarra vímugjafa. Sömu reglur gilda um ferðalög og aðra viðburði í nafni skólans. Sjá nánar Lög um tóbaksvarnir
• Myndatökur og/eða upptökur af nemendum og starfsfólki skólans eru óheimilar án leyfis viðkomandi aðila. Nemendum er ekki heimilt að taka kennslustund upp, hvorki að hluta né í heild, án vitundar og samþykkis kennara og allra sem í henni eru.
• Nemendur bera sjálfir ábyrgð á verðmætum sínum.
• Hvers konar bæklinga-, net- og blaðaútgáfa á vegum nemenda þarf að fara fram í samráði við viðburðarstjóra og/eða skólameistara og lúta lögum um útgáfu og auglýsingar. Það sama gildir um auglýsingar sem hengdar eru upp í skólanum.
• Truflun í kennslustundum af hvaða tagi sem er (t.d. samtöl, síma- og tölvunotkun án heimildar kennara) er ekki liðin og kennara er heimilt að vísa nemendum úr tíma valdi þeir ítrekuðu ónæði.
• Nemendum er óheimilt að bera vopn í skólanum. Hvort sem um er að ræða hnífa, skotvopn, rafbyssur eða önnur þau vopn sem falla undir skilgreiningar vopnalaga nr. 16/1998.
• Á heimavist skólans gilda reglur sem heimavist setur. Sjá nánar á www.heimavist.is

Meðferð og úrlausn mála, viðurlög

Nemendum, kennurum og öðrum starfsmönnum skólans ber að tilkynna ítrekuð og/eða alvarleg brot á skólareglum til skólameistara eða aðstoðarskólameistara, sem ákveða frekari viðurlög.
Ítrekuð brot og þau sem talist geta alvarleg, hvort sem er í tengslum við umgengni, meðferð á eigum skólans eða agabrot, geta varðað brottvikningu úr skóla.
Brot á almennum hegningarlögum verða kærð til lögreglu.
Sjá nánar í reglugerð nr. 326/2016 um ábyrgð og skyldur aðila skólasamfélagsins í framhaldsskólum.

Uppfært 29. maí 2026 (SBE).

Skólasóknarreglur

• Nemendur skulu sækja allar kennslustundir, mæta stundvíslega og undirbúnir, vera virkir og skila verkefnum á tilsettum tíma.

• Kennari merkir við í upphafi kennslustundar. Komi nemandi eftir að nafnakalli er lokið, telst hann koma of seint.
  
  Nemandi telst fjarverandi ef hann kemur meira en 15 mínútum eftir upphaf kennslustundar.

  Fjarvistareglur:

  • 1 fjarvistarstig fyrir fjarvist.
  • ½ fjarvistarstig fyrir seinkomu.
  • 1 fjarvistarstig fyrir að fara úr tímum án leyfis.
• Yfirlit yfir skólasókn er sent í tölvupósti reglulega og gildir sem áminning ef viðvera uppfyllir ekki lágmarkskröfur í Innu.

• Svigrúm vegna fjarvista miðast við 80% mætingu á önninni. Ef nemandi er fjarverandi meira en 20% í áfanga, telst hann hafa sagt sig frá náminu.

  Sjá útskýringarmynd úr Innu.

• Veikindi eða önnur forföll ber að tilkynna samdægurs í gegnum Innu. Forráðamenn þurfa að tilkynna veikindi nemenda undir sjálfræðisaldri í gegnum Innu.

• Veikindi teljast sem fjarvistir en undir ákveðnum kringumstæðum er hægt að taka tillit til þeirra. Nemendur bera ábyrgð á að koma skýringum á fjarvistum til skólans.
• Skipulag skólans er sett upp á dagatali á heimasíðu hans. Breytingar eru tilkynntar nemendum og forráðamönnum ef þær verða.

• Ferðir/æfingar á vegum landsliða teljast ekki til fjarvistarstiga. Skólinn þarf staðfestingu frá viðkomandi sérsambandi til að veita leyfi án stiga.

  Úr aðalnámskrá framhaldsskóla (gr. 16.2):

  "Komið skal til móts við afreksfólk á þann hátt að fjarvera þess á námstíma vegna keppnis- og/eða æfingaferða reiknast ekki inn í skólasóknareinkunn þeirra. [...] Afreksmaður telst sá sem valinn hefur verið í unglingalandslið eða landslið viðkomandi íþrótta-, keppnis-, list- eða starfsgreinar [...]"

Skólasóknarreglur - Vinnubrögð

Undanþága frá þessum reglum er yfirleitt ekki veitt og þá einungis af skólameistara/aðstoðarskólameistara eða sviðsstjórum.

Sjá nánar í reglugerð nr. 326/2016 um ábyrgð og skyldur aðila skólasamfélagsins í framhaldsskólum.

Uppfært 06. september 2024 (áfangastjórn).

Reglur um námsframvindu

Fullnægjandi námsárangur. Nemandi í reglulegu námi 30 einingar eða meira skal standast lágmarkseinkunn í 15 einingum á önn hið minnsta. Nemandi sem hefur færri einingar í töflu sinni þarf að standast a.m.k. helming þeirra á önn. Þessi regla nær til heils skólaárs fyrir nýnema á fyrsta ári í reglulegu námi 60 einingar eða meira og þurfa þeir að standast 30 einingar á árinu. Séu einingarnar færri en 60 einingar á árinu, þarf hann að standast a.m.k. helming þeirra.

Til að standast námsmat í áfanga og fá heimild til að hefja nám í eftirfarandi áfanga þarf lágmarkseinkunnina 5. Nemanda er heimilt að útskrifast með einkunnina 4 í einum áfanga ef um lokaáfanga er að ræða. Sá áfangi gefur ekki einingar. Skilyrði er að nemandinn eigi jafnmargar eða fleiri umframeiningar á sama þrepi til að ná settum heildareiningafjölda til útskriftar.

Fall í áfanga þýðir að nemenda ber að endurtaka nám í áfanganum. Nemanda er heimilt að þreyta próf þrívegis í sama áfanganum. Endurtökupróf eru að öllu jöfnu ekki haldin en hægt er að sækja um heimild til endurtöku prófs ef nemendur eru á útskriftarári sínu í skólanum og prófendurtaka er forsenda fyrir útskrift.

Nemendur hafa heimild til að segja sig úr áfanga á fyrstu þremur vikum annarinnar.

Fall vegna mætinga. Falli nemandi úr áfanga vegna slæmra mætingar, eða hverfi frá námi úr áfanganum eftir að þrjár vikur eru liðnar af önninni, skoðast það sem tilraun við áfangann og nemendinn fær einkunnina F (fall), eða falleinkunn byggða á verkefnavinnu nemandans, skráða í námsferil sinn. Sama regla gildir um nemendur sem hætta í áfanga eftir að frestur til úrsagnar er liðinn.

Reglur um undanfara. Ein af meginreglum áfangakerfisins er að nemendur ljúki áföngum tiltekinnar námsgreinar í ákveðinni röð. Í áfangalýsingum er kveðið á um nauðsynlega og æskilega undanfara. Óski nemandi eftir því að vikið sé frá þessum reglum skal hann leggja skriflega beiðni um það fyrir stjórnendur skólans (stjórnendafund) sem úrskurða hvort það skuli heimilað. Þegar slík ákvörðun er tekin skal hafa eftirfarandi í huga:

• Nemanda skal einungis veitt þessi heimild ef námslokum hans seinkar ella.
• Nemanda á 1. eða 2. ári er að öllu jöfnu ekki veitt þessi heimild.
• Hver nemandi fær aðeins einu sinni að sitja undanfara og eftirfara samtímis á námsferli sínum.
• Hvort undanfari og eftirfari séu kenndir á önninni.

Gerður skal skriflegur samningur milli nemandans og skólameistara þar sem ofangreind atriði eru áréttuð. Þar skal ennfremur koma fram að (1) heimilaðar fjarvistir verði helmingi færri en almennt gildir í viðkomandi áföngum, (2) fall í undanfara eyðileggur sjálfkrafa allan árangur í eftirfara og (3) endurtökupróf í undanfara eru ekki heimiluð (enda er ekki um lokaáfanga greinarinnar að ræða).

Meðferð og úrlausn mála, viðurlög

Uppfylli nemandi ekki þessar kröfur um námsárangur, segir sig frá námi eða er vísað úr skóla telst námsárangur ófullnægjandi. Verkmenntaskólanum á Akureyri er ekki skylt að endurinnrita nemanda sem hefur ekki náð fullnægjandi námsárangri tvær annir í röð.

Nemanda er heimilt að reyna þrívegis við hvern áfanga. Segi nemandi sig úr áfanga eða honum vísað úr áfanga vegna slakra mætinga skoðast það sem tilraun við áfangann.

Námsmatsreglur

Námsmat og færsla einkunna

FRAMKVÆMD NÁMSMATS

Samkvæmt verklagsreglu VKL-106 um heildarstjórnun náms skal tilgreint í námsáætlun GÁT-045 hvernig námsmatinu skuli háttað, vægi verkefna og hvenær þau skuli lögð fyrir. Jafnframt þarf að tiltaka hvort um sé að ræða lokaverkefnisáfanga, símatsáfanga eða lokaprófsáfanga. Sjá flæðirit hér fyrir neðan.

Bifröst er á miðri önn. Þá skulu niðurstöður úr því námsmati sem búið er að leggja fyrir í áfanganum vera komnar inn í einkunnareglu Innu. Miðað er við námsmat samkvæmt námsáætlun viku fyrir Bifröst. Bifröst á ekki við um námskeið sem eru styttri en fjórar vikur né um áfanga í kvöld- og fjarnámi.

Námsmatsdagar eru dreifðir yfir önnina og þá fellur að öllu jöfnu niður kennsla samkvæmt stundaskrá. Kennarar geta kallað nemendur til sín ef þeir vilja hitta nemendur t.d. þá sem hafa misst af námsmatsþáttum. Ef kennarar boða nemendur til sín eiga nemendur að sinna því boði hvort sem það er í kennslustund, í viðtal eða til að ljúka námsmatsþætti.

Einkunnareglur í Innu eru ætlaðar til að halda utan um framvindu náms og veita reglulega endurgjöf sem er mikilvæg til að nemendur hafi tækifæri til að bregðast strax við séu þeir að fara út af sporinu en líka til að hvetja nemendur til að halda áfram að gera vel. Úrræðum fyrir nemendur sem eiga við langvarandi veikindi að stríða og geta ekki lokið námsmati áfanga er lýst í VNL-101.

TEGUNDIR ÁFANGA

Námsmat áfanga er skilgreint með þrennum hætti; símatsáfangi þar sem verkefni annarinnar gilda 100% af námsmati, lokaverkefnisáfangi þar sem nemendur vinna að heildstæðu lokaverkefni sem gildir 100% af einkunn í áfanganum og lokaprófsáfangi þar sem vægi lokaprófs er 30% - 60%.

SÍMATSÁFANGI

Í símatsáfanga er námsmat fjölbreytt og nemendur fá tækifæri til að láta þekkingu sína, leikni og hæfni njóta sín. Allir þættir námsins eru metnir m.a. framfarir, þekking, skilningur, hæfni og leikni.

Til að standast námsmat í símatsáfanga þarf nemandi að hafa náð 45% námsmarkmiða að lágmarki, þ.e. einkunn 5. Á GÁT-038 Gerð námsmatsþátta er gert ráð fyrir að stærsti námsþátturinn sé rýndur af fag-eða brautarstjóra. Í áfanga þar sem námsmat samanstendur af mörgum verkefnum með lítið vægi þarf að rýna 15% af námsmati áfangans óháð fjölda verkefna.

Í símatsáfanga byggir námsmatið á að minnsta kosti fjórum þáttum. Þeim skal flestum vera lokið á kennslutímabili viðkomandi áfanga, en einumn þeirra má skila eftir að kennslu í áfanganum lýkur. Námsmat má innihalda óvirkt námsmat t.d. þegar 15% matsþáttur byggir á fjórum verkefnum/prófum og aðeins þrjú þau bestu gilda. Lokaeinkunn er samsett úr þeim námsmatsþáttum sem koma fram í námsáætlun er vegið meðaltal allra námsmatsþátta á önninni sem gilda til einkunnar og til að hún gildi þurfa nemendur að standast þær kröfur sem settar eru fram í viðkomandi áfanga. Einungis einn námsmatsþáttur má gilda 35% innan símatsáfanga.

LOKAVERKEFNISÁFANGI

Í lokaverkefnisáfanga nota nemendur þá leikni, hæfni og þekkingu sem þeir hafa aflað sér til að vinna að heildstæðu verkefni. Verkefnið er unnið að jafnaði á síðasta námsári. Nemandi velur sér verkefni eftir áhugasviði að höfðu samráði við kennara.

Gert er ráð fyrir að nemandi velji efni tengt sinni braut, þó er mögulegt að víkja frá þeirri reglu, en áfanginn gefur möguleika á þverfaglegu samstarfi. Öllu jafna er lokaverkefnið einstaklings- eða tveggja manna verkefni en hægt er að óska eftir undanþágu sem þarf þá að rökstyðja sérstaklega og lýsa vinnuframlagi hvers og eins í hópnum. Mikil áhersla er lögð á sjálfstæð og skapandi vinnubrögð.

Leggja þarf mat á a.m.k. fjóra þætti. t.d. aðferðir, framkvæmd, úrvinnslu, meðferð heimilda, uppsetningu verkefnis, kynningu o.s.frv. Vægi lokaverkefnis er 100% og kemur vægi einstakra þátta fram í námsáætlun áfangans. Til að standast námsmat í lokaverkefnisáfanga þarf nemandi að hafa náð 45% námsmarkmiða að lágmarki, þ.e. einkunn 5. Í námsáætlun skal tekið fram með hvaða hætti nemendur fái, um miðja önn, skriflegar upplýsingar um stöðu sína í áfanganum.

LOKAPRÓFSÁFANGI

Í lokaprófsáfanga er námsmat fjölbreytt og nemendur fá tækifæri til að láta þekkingu sína, leikni og hæfni í ljós. Námsmatinu er ætlað að vera upplýsandi um stöðu nemandans hverju sinni. Að öllu jafna eru lokaprófsáfangar einungis í 3. þreps áföngum. Lokapróf geta verið innan kennslutíma annar eða í próftöflu á námsmatsdögum í lok annar.

Ljúki áfanga með lokaprófi skal vægi þess vera 30% - 60%. Lokapróf skal vera úr meginefni áfangans. Auk lokaprófs skal áfanginn byggja á að minnsta kosti þremur öðrum námsmatsþáttum. hver þeirra skal gilda mest 20%. Lokaeinkunn áfanga skal vera vegið meðaltal allra námsmatsþátta sem gilda til einkunnar á önninni eins og sett er upp í einkunnareglu í Innu. Til að standast námsmat í lokaprófsáfanga þarf nemandi að standast þær kröfur sem settar eru fram í viðkomandi áfanga og að hafa náð 45% námsmarkmiða að lágmarki, þ.e. einkunn 5. Lokapróf skal rýnt af fag- eða brautarstjóra samkvæmt GÁT-037 Gerð námsmatsþátta.

Kennarar geta skipulagt lokaprófsáfanga með þeim hætti að nái nemendur skilgreindum lágmörkum í námsmatsþáttum yfir önnina geta nemendur sleppt lokaprófi, svokallað valið lokapróf. Ef um valið lokapróf er að ræða þá þarf einnig að rýna stærsta námsmatsþátt annan en lokapróf.

VIÐURLÖG VIÐ BROTI Á NÁMSMATSREGLUM

Verði nemandi uppvís að því að hafa rangt við í námsmati vísar kennari málinu til meðferðar áfangastjóra eða viðeigandi sviðsstjóra sem fyllir út GÁT - 039 Brot á námsmatsreglum. Viðurlög við brotum fara eftir hversu alvarleg brotin eru talin og hvort um ítrekuð brot sé að ræða.

Ámælisvert brot eða óæskileg hegðun í námsmati getur leitt af sér niðurfellingu námsmatsþáttar eða kröfu um endurtöku á námsmatsþætti. Nemandi getur einnig fengið formlega áminningu á feril sinn. Alvarlegt brot eða endurtekin brot í námsmati geta varðar brottvísun úr áfanga. Mjög alvarlegt brot eða ítrekuð alvarleg brot geta varðað brottvísun úr skóla.

Uppfært 25.04.2025

Prófareglur

1. Ef nemandi er veikur þegar lokapróf fer fram skal hann tilkynna það skrifstofu VMA
   að morgni prófdags ella hefur hann fyrirgert rétti sínum til sjúkraprófs. Skráning í
   sjúkrapróf fer fram á skrifstofu skólans um leið og veikindi eru tilkynnt með GÁT-
   060 Skráning í sjúkrapróf.
2. Nemendum ber að leggja persónuskilríki með mynd á borð eða vinnustöð í upphafi
   prófs. Ef nemandi hefur ekki persónuskilríki með sér er heimilt að leita til prófhafa til
   staðfestingar um að nemandi sé skráður í áfanga. Ef ekki er hægt að staðfesta hver
   nemandi er, skal prófstjóri ákvarða hvernig tekið er á málinu.
3. Próftími kemur fram á forsíðu prófs. Nemendur hafa heimild til að sitja 30 mínútum
   lengur en próftími segir til um.
4. Nemendum ber að sitja hið minnsta 45 mínútur við verkefni sitt í hverju prófi. Komi
   nemandi meira en 45 mínútum of seint til prófs, hefur hann glatað rétti sínum til að
   þreyta prófið.
5. Öll meðferð snjalltækja er stranglega bönnuð á prófstað.
6. Ef vafi leikur á próftökurétti nemanda, t.d. vegna fjarvista eða hann hefur ekki lokið
   tilskyldum verkefnum, skal nemandinn ganga úr skugga um rétt sinn hjá sviðsstjóra
   sínum fyrir prófið.
7. Nemanda er ekki heimilt að fara án eftirlits úr prófstofu og koma aftur inn og ljúka við
   að leysa prófið.
8. Meðferð matar og drykkjar er að öllu jöfnu óheimil í prófstofu.
9. Alger þögn skal ríkja í prófstofu. Ef nemandi þarfnast aðstoðar, skal hann rétta upp
   hönd. Nemandi má ekki þiggja eða veita öðrum próftökum aðstoð meðan á prófi
   stendur.
10. Einungis hjálpargögn sem tilgreind eru á forsíðu prófa eru leyfileg.
11. Nemanda er ekki heimilt að hefja próftöku fyrr en yfirsetukennari hefur gefið merki
    um slíkt.
12. Grunað prófsvindl er tilkynnt til prófstjóra sem metur alvarleika hvers tilviks og hver
    viðbrögð skulu vera. Prófsvindl þýðir að jafnaði fall í áfanga eða brottrekstur úr skóla.