Skólastjórnendur og kennarar frá þremur löndum heimsóttu VMA
Í síðustu viku var, eins og oft áður, gestkvæmt í VMA. Sex kennarar frá Belgíu og Slóveníu voru í skólanum og kynntu sér kennsluna á bæði bóklegum og verklegum námsbrautum og einnig var í skólanum íslenskur kennari sem starfar við verknámsskóla í Danmörku.
Erasmus+ samstarf VMA við skóla út um alla Evrópu birtist í ýmsum myndum. Frá VMA fara nemendur með kennurum í heimsóknir í skóla og einnig fara kennarar í skólaheimsóknir (svokallaða starfsspeglun) í Evrópu og á móti koma í VMA kennarar frá öðrum löndum, eins og í liðinni viku. Allar þessar heimsóknir hafa það að leiðarljósi að víkka út sjóndeildarhring nemenda og kennara, að kynna sér hvernig staðið er að kennslu í öðrum löndum og fá um leið innsýn í ólíka menningarheima. Allt er þetta til þess fallið að styrkja, þroska og efla.
Sem fyrr segir voru sjö kennarar sem starfa í þremur löndum í heimsókn í VMA í síðustu viku. Fimm þeirra komu frá Belgíu, annars vegar tveir frá skóla í Brussel og hins vegar þrír frá skóla í De Pinte. Sjötti kennarinn kom frá Slóveníu.
Hér má sjá þessa sex kennara. Lengst til vinstri er Miguel Detemmerman, skólastjóri í GO ! Erasmusatheneum De Pinte framhaldsskólanum í smábænum De Pinte í flæmskumælandi hluta Belgíu, um það bil 15 km frá Ghent, Pieter Vielfont skólastjóri GO!4TECH BRUSSEL, sem er raungreina- og verknámsskóli í Brussel, Ellen Pauwels alþjóðafulltrúi GO!4TECH BRUSSEL, Nathalie Hanssens þýsku- og flæmskukennari í GO! Erasmusatheneum De Pinte, Hanne tungumálakennari í sama skóla og loks Matjaž Dlouhy efnafræði- og stærðfræðikennari í Gimnazija Ledina framhaldsskólanum í Ljubljana í Slóveníu.
Hanne, Nathalie og Miguel frá DePinte voru í starfsspeglun í VMA og kynntu sér eitt og annað í skólastarfinu. Matjaz var sömuleiðis í starfsspeglun og kynnti sér stærðfræðikennsluna hjá Hilmari Friðjónssyni og einnig kynnti hann sér kynjafræðikennslu Snorra Björnssonar. Þá fékk innsýn í kennslu á verknámsbrautum skólans, bæði í hársnyrtiiðn og á byggingadeild. Pieter og Ellen frá Brussel voru í VMA sl. fimmtudag og föstudag, fyrst og fremst til að kynna sér möguleika á frekara samstarfi við VMA, m.a. með möguleika á nemendaskiptum í matvælagreinum.
Sjöundi kennarinn sem var í VMA í liðinni viku er íslenskur, Hjörtur Gíslason, sem starfar í verkmenntaskólanum U Nord í Hilleröd í Danmörku. Hann var með fyrirlestur og námskeið á rafiðnbraut en milli U Nord og VMA hafa skapast sterk tengsl og fór hópur nemenda og kennara af brautinni í heimsókn í U Nord í apríl sl.