Í Green-verkefninu í Roermond

Nemendur fjórir á rafdeild VMA sem voru í Erasmus+ verkefni í Hollandi í síðustu viku.

Í síðustu viku voru fjórir nemendur og þrír kennarar frá rafdeild VMA í Erasmus+ verkefninu Green (Green Revolution Environmental Education Nurturing) í Wings Agora skólanum í Roermond í Hollandi. Um er að ræða samstarfsverkefni fimm skóla í jafnmörgum löndum – auk Íslands og Hollands taka þátt í verkefninu skólar í Króatíu, Portúgal og Tyrklandi.

Green-verkefnið hófst í VMA í maí sl. og var því fram haldið í Roermond. Eins og yfirskrift verkefnisins gefur til kynna er áherslan á grænar lausnir og sjálfbærni. Nálgunin er mismunandi, í fyrsta áfanga verkefnisins í VMA var horft til grænnar og endurnýtanlegrar orku en í Hollandi var stóra verkefnið að hanna rafeindastýringu fyrir svokallaðan lóðréttan garð (e. Vertical Garden) sem ætlunin er að setja upp í öllum þátttökuskólunum.

Sem fyrr segir tóku fjórir nemendur úr rafdeild VMA þátt í verkefninu í Roermond – þrír í rafvirkjun og einn í rafeindavirkjun – auk kennaranna Hauks Eiríkssonar, Óskars Inga Sigurðssonar og Gísla Arnar Guðmundssonar.

Roermond er um 60 þúsund manna bær í héraðinu Limburg í suðausturhluta Hollands, skammt frá landamærum að Belgíu og Þýskalandi.

Green-verkefnið heldur áfram í vetur. Á vorönn hittast fulltrúar þátttökuskólanna í Portugal.