Kennarar fræðast í Gryfjunni
Eftir hádegi í dag – eftir að kennslu lauk – komu kennarar VMA og tveggja annarra framhaldsskóla á Norðurlandi, MA og Framhaldsskólans á Laugum, saman í Gryfjunni til þess að meðtaka fræðslu af ýmsum toga og jafnframt að hittast og eiga góða stund saman. Það er því óhætt að segja að það hafi verið heldur betur þéttskipað í Gryfjunni í dag.
Stefán Haukur Björnsson, samfélagslögreglumaður á Akureyri, reið á vaðið og ræddi um stöðu fíkniefnamála hjá ungu fólki. Kom fram hjá honum að sem fyrr séu fíkniefni af ýmsum toga í umferð og umhugsunarvert sé að það sé jafnvel auðveldara fyrir ungt fólk að nálgast þau en áfengi. Að erindi Stefáns loknu fékk hann fjölda spurninga frá kennurum um eitt og annað er lýtur að ávana- og fíkniefnum og hvernig skólarnir geti lagt sitt af mörkum í forvörnum.
Í öðru erindi dagsins ræddi fulltrúi Samtakanna 78 um málefni hinsegin fólks og orðræðuna í skólasamfélaginu. Loks var Kjartan Sigurðsson með erindi um vinnustaðamenningu.
Auk þessarar samfélagsfræðslu kennara í Gryfjunni hófst eftir hádegi í dag í VMA svokallað Norðurlan tölvuleikjamót, sem stendur fram á sunnudag, 18. október. Aðgangur er ókeypis.