HEHA1DR02S - Daglegur heimilisrekstur

Lýsing

Áfangalýsing:

Í áfanganum verður lögð áhersla á þau fjölmörgu verkefni og skyldur sem nemendur standa frammi fyrir í dag og lúta að sjálfstæðri búsetu. Fjallað verður um hvað þýðir að vera ábyrgur neytandi í nútíma samfélagi og hvernig það endurspeglast í daglegu lífi. Hvernig hegðun okkar og venjur geta dregið úr óþarfa neyslu, matarsóun og aukið almenna nýtni. Nemendur kynnast helstu heimilisstörfum, skipulagi heimilishalds, mikilvægi viðhalds og öryggis á heimili. Þeir framkvæma verðkönnun, áætlun um matarinnkaup og einfalt heimilisbókhald. Nemendur leysa verkefnin á sjálfstæðan hátt og í samvinnu við aðra.

Markmið

Nemandi öðlast þekkingu og skilning á:

• hvað það þýðir að vera ábyrgur þátttakandi og neytandi í lýðræðissamfélagi
• helstu skyldum og störfum sem felast í sjálfstæðri búsetu
• jákvæðum og neikvæðum áhrifum neysluhegðunar
• margvíslegum verkefnum sem fylgja heimilishaldi
• gagnsemi þess að skipuleggja heimilisstörf, matarinnkaup og heimilisbókhald
• helstu slysahættum og mikilvægi öryggis á eigin heimili

Nemandi öðlast leikni í að:

• sinna almennum heimilisstörfum
• sinna nauðsynlegu viðhaldi eins og kostur er
• halda heimilisbókhald og gera áætlanir um innkaup meðsparsemií huga
• temja sér almenna nýtni og koma í veg fyrir matarsóun
• meta hættur á heimili og þekkja varnir sem tryggja öryggi

Nemandi nýtir almennu þekkingu sína og leikni til að:

• skipuleggja og sinna heimilisstörfum og viðhaldi á heimili
• sjá um innkaup á hagnýtan hátt
• minnka matarsóun og stuðla að nýtni í sjálfstæðri búsetu
• minnka áhættu á slysum á heimili sínu
• njóta líðandi stundar sem ábyrgur neytandi í sátt við umhverfi sitt