HBFR1ÉG02S - Heilbrigðisfræði með áherslu á sjálfsmynd og samskipti

Lýsing

Áfanginn byggist upp á sex stoðum menntunar eins og þær koma fram í Aðalnámskrá framhaldsskóla; læsi í víðum skilningi, menntun til sjálfbærni, heilbrigði og velferð, lýðræði og mannréttindi, jafnrétti og sköpun. Fjallað verður um hugtök á borð við sjálfsmynd og sjálfsvitund, samskipti, samskiptamiðla, forvarnir, lífstíl, geðheilbrigði, fjölmenningu, víðsýni, jafnrétti kynjanna og ábyrgð okkar í samfélaginu. Lögð er áhersla á gagnrýna hugsun og mikilvægi þess að taka þátt í samfélagi og þeirri umræðu sem fer þar fram.

Markmið:

Þekkingarviðmið - Nemandi skal hafa öðlast þekkingu og skilning á:

• Jafnréttishugtakinu í víðum skilningi s.s. út frá búsetu, kynþætti, fötlun, trúarbrögðum, aldri, kynhegðun o.s.frv.
• Hvað þýðir að vera virkur og ábyrgur þátttakandi í lýðræðissamfélagi og mikilvægi þess að vera þátttakandi í að skapa fordómalaust samfélag
• Áhrifum jafnréttisbaráttunnar, stöðu karla og kvenna í íslensku samfélagi fyrr og nú
• Mikilvægi þess að hlúa að sjálfum sér s.s. með almennri umhirðu líkamans, líkamsþjálfun, næringu og geðrækt
• Áhrifum góðrar sjálfsmyndar á eigið geðheilbrigði
• Sjálfum sér sem kynveru og ábyrgðinni sem því fylgir

Leikniviðmið - Nemandi skal hafa öðlast leikni í að:

• Lifa heilbrigðu lífi á eigin forsendum
• Skilja eigin þarfir, muninn á réttu og röngu og geta tekið ákvarðanir í samræmi við það
• Gagnrýnni hugsun og merkingu hennar fyrir einstaklinginn
• Átta sig á að til eru mismunandi leiðir í samskiptum og samstarfi

Hæfniviðmið - Nemandi skal geta hagnýtt þá almennu þekkingu og leikni sem hann hefur aflað sér til að:

• Beita gagnrýnni hugsun s.s. með læsi í ýmsa miðla; fjölmiðla og netsamfélagið
• Eiga í félagslegum samskiptum og tala um tilfinningar sínar og reynslu
• Átta sig á að allir eru misjafnir og það verður að virða hvern og einn fyrir það sem hann er/stendur fyrir