Samstarf Bjarmahlíðar og framhaldsskólanna á Norðurlandi
Nýverið var undirritað samkomulag milli framhaldsskólanna sex á Norðurlandi, þar á meðal VMA, og Bjarmahlíðar, miðstöðvar fyrir þolendur ofbeldis á Norðurlandi, sem felur í sér fræðslu til skólanna og stuðning við fagaðila innan þeirra eftir þörfum. Þessi samningur um samstarf skólanna og Bjarmahlíðar gildir til vors 2023, út þetta skólaár.
Í tilkynningu um samstarfið segir að það sé til komið vegna þess að á síðustu misserum hafi komið í ljós vaxandi þörf fyrir stuðning við ungt fólk á framhaldsskólaaldri – frá 16 ára aldri.
Í tilkynningu segir:
„Með beinu samtali við nemendur mun Bjarmahlíð markvisst leitast við að sníða þjónustu sína við þolendur á framhaldsskólaaldri að þeirra þörfum þegar kemur að ofbeldisforvörnum og úrræðum. Leiðarstef í allri vinnu Bjarmahlíðar með ungmennum er að styðja við merkingarbæra þátttöku þeirra en að huga jafnframt að vernd þeirra. Þar liggja til grundvallar grunngreinar Barnasáttmála Sameinuðu þjóðanna.“
Einnig segir í tilkynningunni:
„Þjónustuaukningin við 16-18 ára í Bjarmahlíð felur sér að boðið er upp á viðtöl þar sem samþætt eru viðbrögð, úrræði, leiðir til valdeflingar og eftirfylgd eftir að ofbeldi hefur átt sér stað. Slík þjónustuaukning er ekki gerð nema í þéttu samtali og samstarfi við aðila innan hefðbundins skóla- og frístundastarfs, stuðningskerfa félags- og barnaverndar og lögregluna. Bjarmahlíð mætir ungmennunum með áfallamiðaðri nálgun sem felur sér valdeflingu og eflingu áfallaseiglu, sem um leið geta orðið verndandi aðgerðir gegn ofbeldi síðar á lífsleiðinni. Hægt er að panta tíma í gegnum heimasíðu Bjarmahlíðar: bjarmahlid.is og með því að senda póst á bjarmahlid@bjarmahlid.is. Boðið er upp á stað- og fjarviðtöl.“
Bjarmahlíð hóf starfsemi fyrir þremur árum og hafa yfir 400 manns,18 ára og eldri, fengið þjónustu þar. Bjarmahlíð er mikilvægur tengiliður við opinberar stofnanir, félagssamtök og bjargráð innan þeirra um úrvinnslu ofbeldis. Þjónusta Bjarmahlíðar er þolendum að kostnaðarlausu og rekin í anda hugmyndafræði Family Justice Center.
Á meðfylgjandi mynd, sem var tekin þegar formlega var gengið frá samkomulaginu, eru frá vinstri: Páley Borgþórsdóttir, lögreglustjóri á Norðurlandi eystra, Agnes Björk Blöndal, saksóknarfulltrúi lögreglustjórans á Norðurlandi eystra, Valgerður Gunnarsdóttir, skólameistari Framhaldsskólans á Húsavík, Sigurbjörn Árni Arngrímsson, skólameistari Framhaldsskólans á Laugum, og Sigríður Huld Jónsdóttir, skólameistari VMA.