Nú styttist í árshátíð VMA
Undirbúningur fyrir árshátíð VMA er nú í fullum gangi, enda ekki nema rösk vika þar til hún verður haldin í Íþróttahöllinni á Akureyri, nánar tiltekið fimmtudagskvöldið 28. febrúar nk. Enginn annar en Páll Óskar mun sjá um að halda uppi fjörinu á dansgólfinu, ásamt Tiny og Stony. Veislustjórar verða Hamborgarafabrikkufélagarnir Simmi og Jói.
Jónas Kári Eiríksson, formaður Þórdunu, segir að vitaskuld sé eftirvænting í loftinu, enda árshátíðin að sjálfsögðu einn af hápunktum vetrarins í félagslífinu. Hann segir að þema kvöldsins verði Óskarsverðlaunahátíðin, sem einmitt verður haldin nk. sunnudagskvöld í Hollywood.
Auk framangreindra skemmtikrafta verða þéttskipuð skemmtidagskrá á meðan á borðhaldinu stendur. Þar má nefna að þeir sem lentu í þremur efstu sætunum í Söngkeppni VMA á dögunum munu stíga á stokk, sýnt verður myndband, sem Yggdrasil - Leikfélag VMA - hefur unnið, en þar verða kennarar m.a. sýndir í spéspegli. Flutt verða ávörp og margt fleira.
Húsið verður opnað kl. 19.00 en borðhald hefst klukkan 19.30.
Miðasala hefst í lok þessarar viku á skrifstofu Þórdunu í VMA. Verð aðgöngumiða fyrir félaga í skólafélögum VMA og MA er kr. 5.990 en 6.990 kr. fyrir aðra.