Lagskipting í Listasafninu
Í dag, þriðjudaginn 1. nóvember, kl. 17-17.40 heldur Rebekka Kühnis, myndlistarkona og kennari, þriðjudagsfyrirlestur í Listasafninu á Akureyri sem hún kallar Lagskipting. Þar fjallar hún um myndlistarferil sinn og ástæðu þess að hún endaði á Akureyri að teikna og mála íslenskt landslag.
Rebekka Kühnis er frá Windisch í Sviss og útskrifaðist með meistaragráðu í listkennslufræðum frá Hochschule der Künste í Bern. Hún starfar sem myndlistarkona og sýnir nú verk sín í einum af sölum Listasafnsins á Akureyri.
Rebekka kenndi um hríð myndlist og listasögu í Sviss, en kennir í dag hönnun, smíði, myndmennt og umhverfismennt í Hrafnagilsskóla í Eyjafjarðarsveit.
Að þriðjudagsfyrirlestrunum standa Listasafnið á Akureyri, Gilfélagið, VMA, Myndlistarfélagið og MA. Aðgangur er ókeypis.