Björg með þriðjudagsfyrirlestur í Ketilhúsinu
Björg Eiríksdóttir, myndlistarkona og kennari við listnáms- og hönnunarbraut VMA, heldur fyrirlestur í Ketilhúsinu í dag, þriðjudaginn 5. mars, kl. 17:00-17:30, undir yfirskriftinni Að elta innsæið. Í fyrirlestrinum fjallar Björg um tilurð og innihald valinna verka sinna og varpar ljósi á sköpunarferlið og rannsókn sem er í gangi vegna sýningar sem verður í Listasafninu á Akureyri í október nk.
Björg hefur útfært hugmyndir sínar í málverk, teikningu, þrykk, útsaum og vídeó. Viðfangsefnið hefur verið innra líf mannslíkamans og samskipti hans við umhverfið í gegnum skynjun. Samskiptin við verkin í vinnuferlinu hafa einnig verið í forgrunni og í þeim má oft sjá mynstur, lagskiptingu, nálægð og tíma.
Björg Eiríksdóttir var útnefnd bæjarlistamaður á Akureyri í fyrravor og hefur því einbeitt sér að listsköpun sinni síðustu mánuði. Af þeirri ástæðu hefur Björg ekki kennt myndlist við listnáms- og hönnunarbraut VMA í vetur.
Björg lauk B.Ed. frá KHÍ árið1991, diplómu í myndlist frá Myndlistaskólanum á Akureyri árið 2003 og MA í listkennslu frá HA og LHÍ vorið 2017. Hún hefur efnt til tíu einkasýninga og tekið þátt í fjölda samsýninga.
Þriðjudagsfyrirlestrarnir í Ketilhúsinu í vetur eru samvinnuverkefni Listasafnsins á Akureyri, VMA, Gilfélagsins og Myndlistarfélagsins.
Ókeypis er á fyrirlestur Bjargar og eru allir velkomnir.