Kennarar frá Köbenhavns VUC í heimsókn í VMA
Þessa viku hafa tveir danskir kennarar, Hanne Mortensen og Sören Cardel Lindskrog, frá Köbenhavns VUC (voksen uddannelses center) verið í VMA til að kynna sér starfsemi skólans og kenna nemendum í VMA dönsku. Heimsóknin er liður í norrænu samstarfsverkefni sem VMA og Köbenhavns VUC taka þátt í. Auk þess koma að verkefninu nokkrar stofnanir og fleiri skólar; Katrinelundsgymnasiet i Gautaborg í Svíþjóð, Hadeland videregående skole i Noregi og Århus Universitet í Danmörku.
Verkefnið, sem beinir sjónum að tungumálakennslu, er styrkt af Norrænu ráðherranefndinni – svokallað Nord+ verkefni. Sem rauður þráður í gegnum verkefnið eru norrænar glæpasögur en sem kunnugt er hafa Norðurlöndin markað sér ákveðna sérstöðu í útgáfu á glæpasögum og gerð glæpaþátta í sjónvarpi. Nægir þar að nefna nýjustu afurðina, Ófærð, sem hefur fengið mjög góðar viðtökur erlendis, m.a. í Noregi.
Norræna ráðherranefndin greiðir ferðakostnað og uppihald. Um er að ræða þriggja ára verkefni sem hófst í ágúst á sl. ári. og fara kennarar frá áðurnefndum skólum á milli landanna og kenna þar til í nokkra daga. Í næsta mánuði fara tveir kennarar frá VMA, Annette de Vink og Þorbjörg Dóra Gunnarsdóttir til Kaupmannahafnar til að kynna sér starfsemi Köbenhavns VUC og kenna nemendum þar. Í sama mánuði verður fundur í verkefninu í VMA og þar verða fulltrúar allra þeirra skóla og stofnana sem taka þátt í því til að leggja línur og skipuleggja næstu skref.
Hanne Mortensen kennir dönsku og sögu en Sören Cardel Lindskrog kennir innflytjendum dönsku sem annað tungumál. Nemendur Köbenhavns VUC eru flestir á aldrinum 18 til 50 ára og er meðalaldur þeirra ca. 22 ár. Margir nemendanna hafa af einhverjum ástæðum hætt í framhaldsskóla en ákveðið að taka upp þráðinn að nýju. Nemendasamsetning skólans er því töluvert frábrugðin VMA.
Hanne og Sören segja að dönsku kennararnir sem taka þátt í verkefninu hafi nánast slegist um að fá að fara til Akureyrar enda sé Ísland á vissan hátt framandi og flestir hafi komið áður til nágrannalandanna Noregs og Svíþjóðar. Fólki hafi því þótt mest spennandi og eftirsóknarverðast að fara til Íslands.