Sóttvarnir í VMA

Grímuskylda er í almennum rýmum skólans s.s. á göngum og í Gryfju. Nemendur og kennarar geta tekið niður grímuna þegar þeir eru sestir niður í kennslustund en við mælum með því að fólk noti grímu alltaf þegar ekki er hægt að tryggja eins metra fjarlægð á milli einstaklinga. 

Nemendur taka þátt í sótthreinsun í kennslustofum að lokinni kennslustund samkvæmt fyrirmælum kennara. 

Nemendur eiga alls ekki að mæta í skólann ef þeir eru með kvef eða önnur Covid-19 einkenni. Ef nemendur finna fyrir einkennum þá eiga þeir að panta tíma í sýnatöku og ekki mæta í skólann fyrr en eftir að niðurstaða er komin. 

Nemendur sem hafa nýlega verið erlendis eru hvattir til að fara í sýnatöku áður en þeir mæta aftur í skólann. 

Hafi nemandi ekki farið í bólusetningu er hann hvattur til að gera það - upplýsingar eru á heimasíðu HSN. 

Við mælum eindregið með því að nemendur noti smitrakningarappið. 

Nemendur eru vinsamlegast beðnir um að fara eftir þeim fyrirmælum sem sett eru fram af stjórnendum skólans og yfirvöldum. Notum tíma okkar og annarra í nám og kennslu, það er allra hagur að fara eftir þeim sóttvarnarreglum sem eru í gildi á hverjum tíma. Ítrekuð sóttvarnarbrot geta leitt til tímabundinnar brotvikningar frá námi og skólanum. 

Allar upplýsingar varðandi Covid eru á covid.is og þar eru upplýsingar á mörgum tungumálum. 

Þetta ástand mun reyna á okkur öll og við þurfum að lifa með veirunni og þeim tilmælum og fyrirmælum sem koma frá sóttvarnaryfirvöldum á hverjum tíma. Við þurfum að vera tilbúin að breyta um takt ef reglurnar breytast en að leiðarljósi höfum við velferð og menntun nemenda eins og ávallt. Í stefnu skólans kemur fram að nemendur séu hornsteinn skólans. Það að þeir þroskist, öðlist sjálfstraust, líði vel, tilheyri hópnum og tileinki sér ákveðna leikni, þekkingu og hæfni. Þessum gildum munum við sem fyrr halda á lofti ásamt því að bjóða upp á öruggt náms- og starfsumhverfi. 

Við verðum að sýna samstöðu, þolinmæði og seiglu til að takast á við breytt skólastarf. Við getum þetta saman. 

Sigríður Huld Jónsdóttir, skólameistari VMA

Uppfært 18. ágúst 2021 (SHJ).