Þróunarstarf og sjálfsmat

Samkvæmt framhaldsskólalögum ber skólum skylda til að framkvæma sjálfsmat. Sjálfsmat er aðferð sem skólar geta og eiga að beita til þess að fylgjast með skipulegum og formlegum hætti með eigin starfsemi. Tilgangurinn er sá að greina stöðu sem síðan er hægt að bregðast við ef þörf krefur. Í þessum skilningi er sjálfsmat hluti af gæðastarfsemi skóla, hluti af því að greina styrkleika og veikleika sem síðan er hægt að bregðast við með viðeigandi hætti.

Verkmenntaskólinn á Akueyri vinnur eftir gæðakerfi og er vottað með ÍSO-staðal 9001. Í gæðastaðlinum er gert ráð fyrir margskonar mati. Má þar nefna:

Kennslumat: þar meta nemendur kennsluna, aðstöðu og námsefnið. Þetta mat er svo lagt til grundvallar í starfsmannaviðtölum.

Framvindumat: þar meta kennarar hvernig kennslan gengur í hverjum áfanga og hvort þeir séu að fylgja þeirri kennsluáætlun sem lagt var upp með. Þetta er framkvæmt á hverri önn.

Áfangamat: þar er skoðaður árangur nemenda, hvernig áfanginn gekk og hvað má gera betur. Jafnframt kemur þarna fram hvort einhverju var ábótavant í kennslunni.

Þjónustumat: þar er lagt upp með að meta þjónustu sem skólinn veitir. Þar hefur t.d. verið skoðað hvernig líðan nemenda á heimavist er, hvernig nemendur líta á þjónustu á bókasafni, námsráðgjafa o.s.frv.

Stjórnendamat: þar meta starfsmenn skólans stjórnendur með tilliti til hæfileika, stjórnunar og ýmissa annarra þátta.

Innra mat: þar eru allar verklagsreglur gæðakerfisins teknar út og skoðaðar. Eru kennarar, stjórnendur, nemendur og aðrir starfsmenn skólans að vinna eftir gæðakerfinu?

Ytra mat: þar kemur úttektarmaður frá Vottun ehf. Úttektarmaðurinn skoðar hvort við séum að vinna eftir kerfinu og hvort við uppfyllum þá þætti sem þarf til að viðhalda vottuninn á skólanum.

Meta má styrkleika og veikleika skólans á grundvelli þeirra niðurstaðna sem koma í ljós í þessum könnunum. Hægt er að vinna úr þeim þáttum sem þarfnast úrbóta og styrkja þannig það sem betur má fara en jafnframt gleðjast yfir því sem vel hefur tekist.

Það er mikilvægt að hafa það í huga að þó skipulega sé unnið að sjálfsmati þá dugar það eitt og sér ekki til þess að laga það sem betur má fara. Matið er til að taka púlsinn og sýna stöðuna en það er síðan stjórnenda skólans og reyndar stofnunarinnar í heild að bregðast við niðurstöðum og ráðast í úrbætur þar sem þess er þörf. Matið er þannig hluti af stöðugri hringrás þar sem skiptast á stöðumat og viðbrögð við því sem út úr því kemur. Einungis með vinnubrögðum af þessu tagi má ætla að skólinn nái þangað sem hann ætlar sér, verði að þeim skóla sem menn eru sammála um að stefnt skuli að.