Samstarf innan skólans
Á stórum vinnustað eins og VMA er mikils um vert að upplýsinga- og tjáskiptaleiðir séu greiðar. Stefnt er að því að svo megi verða.
Kennarafundir
Kappkostað er að halda almenna kennarafundi eigi sjaldnar en mánaðarlega. Þeir eru vettvangur upplýsingagjafar og skoðanaskipta milli kennara og stjórnenda.
Að jafnaði er öllum kennurum skylt að mæta á kennarafundi af þessum ástæðum en þeir eru skipulagðir og þeim stjórnað af skólameistara.
Í lögum um framhaldsskóla frá 1996 segir:
,,Almennur kennarafundur í framhaldsskóla fjallar um stefnumörkun í starfi skólans, um námsskipan, kennsluhætti, þar með talið námsmat, og aðra starfsemi og kemur tillögum sínum á framfæri við skólanefnd og skólaráð. Kennarafund skal halda eigi sjaldnar en fjórum sinnum á hverju skólaári. Skylt er skólameistara að halda kennarafund ef fulltrúar kennara í skólaráði eða þriðjungur fastra kennara skólans krefjast þess.”
Kennarafundir eru boðaðir annars vegar með auglýsingu á aðalkennarastofu og hins vegar með tölvupósti sem allir kennarar skólans fá. Einnig er dagsetningum kennarafunda komið á framfæri á fyrsta kennarafundi hvorrar annar.
Einnig eru ýmsum upplýsingum öðrum komið á framfæri með tölvupósti þar eð gert er ráð fyrir að allir kennarar hafi aðgang að honum í skólanum og/eða á heimili sínu.
Stjórnendafundir
Vikulega eru haldnir stjórnendafundir. Þá sitja, auk skólameistara og aðstoðarskólameistara, áfangastjórar, kennslustjórar og námsráðgjafar. Á fundum þessum er ýmsum upplýsingum er varða stjórn skólans og skólastarfið yfirleitt komið á framfæri, málefni einstakra nemenda rædd er lúta að námi þeirra, persónulegum aðstæðum o.s.frv.
Þá er þessi vettvangur gjarnan notaður til þess að viðra nýjar hugmyndir er varða starf skólans áður en þær eru kynntar á kennarafundum og/eða gagnvart öðru starfsfólki eða nemendum.
Fundir með öðrum starfsmönnum
Skólameistari mun leitast við að halda samráðs- og upplýsingafundi með starfsfólki á skrifstofu og húsvörðum næsta dag á eftir kennarafundum. Þar verður skifst á skoðunum og veittar upplýsingar um skólastarfið á báða bóga. Þessi tímasetning er hugsuð til þess að þær upplýsingar og ýmis þau mál sem fram koma á kennarafundum verði þessu starfsfólki kunnug ekki síður enda skrifstofa skólans miðstöð upplýsinga á margan hátt. Þá heldur skólameistari einnig sérstakan fund með ræstitæknum utan hefðbundins skóladags. Er það nauðsynlegt þar eð ræstitæknar sinna störfum sínum þegar bæði nemendur, kennarar og annað starfsfólk er farið heim að loknum vinnudegi.
Gryfjufundir með nemendum
Skólameistari boðar alla nemendur til fundar í Gryfjunni hvern virkan mánudag í hverjum mánuði á starfstíma skólans. Þar kemur hann á framfæri upplýsingum til nemenda og getur talað til þeirra á opinskáan hátt þegar svo ber undir. Þessir fundir eru jafnframt ætlaðir til skoðanaskipta.
Kallkerfi
Komið hefur verið upp símtæki í öllum kennarastofum, skrifstofum og kennslurýmum skólans. Hefur það verið gert til þess að starfsfólk og nemendur geti ávallt verið í sambandi við umheiminn þegar svo ber undir. Með þessum hætti getur skólameistari með einu handtaki náð sambandi við gjörvallt skólasamfélagið. Þarna hefur því opnast greið leið til að koma á framfæri skilaboðum og upplýsingum hvort sem er við fólk í einstökum rýmum ellegar allan skólann í senn. Til Gryfjufundar er boðað með þessu móti svo dæmi sé tekið.
Greiður aðgangur að starfsmönnum
Bæði nemendur og kennarar eiga greiðan aðgang að stjórnendum skólans. Þeir hafa hvort sem er sérstaka viðtalstíma auk þess sem þeir eru ávallt reiðubúnir að ræða málin, hlusta á ábendingar og athugasemdir þegar svo ber undir.
Skólameistari er ekki með sérstakan viðtalstíma en kappkostar að tryggja starfsmönnum sem nemendum skólans greiðan aðgang að sér.
Greiður aðgangur að skólameistara
Skólameistari kappkostar að vera sýnilegur í skólanum þannig að bæði nemendur, kennarar og annað starfsfólk eigi greiðan aðgang að honum. Hann leitast við að heimsækja nemendur og kennara í kennslustundir eftir því sem unnt er að koma því við. Þar fær hann tækifæri til að ræða við nemendur um námið og kennara um kennsluna og tilhögun hennar. Þá eru heimsóknir af þessu tagi ekki síst mikilvægar til að halda uppi jákvæðum samskiptum og góðum anda í skólanum.
Þá eru skipulögð starfsmannaviðtöl á stefnuskrá skólameistara og verði þau einn af föstum þáttum í samskiptum hans og starfsfólks.Slík skipulögð viðtöl eru ekki framkvæmanleg nema á löngum tíma þar eð starsfmenn skólans eru yfir eitthundrað að tölu.
Engu að síður á skólameistari formlega sem óformlega fundi með fjölda starfsmanna á starfstíma skólans, bæði um mál er varða sjálft starf þeirra eða persónulega hagi. Skólameistari leggur áherslu á það við starfsfólk og nemendur að dyrnar inn til hans séu opnar og þeir geti leitað þangað hvenær sem þeim þykir ástæða til, hvort sem er til að bera upp mál og erindi eða einfaldlega til að spjalla.
Heimasíða skólans: www.vma.is
Á heimsíðu skólans birtast reglulega fréttir af skólastarfinu auk þess sem þar er vísað til vefslóða þar sem finna má hvers konar upplýsingar um skólastarfið eins og skóladagatal og sitthvað er varðar starfsemi hans frá degi til dags. Er þessi vettvangur hvort sem er ætlaður til upplýsingar fyrir nemendur og starfsfólk eins og aðila utan skólans.
