Fara í efni

Um 77% nemenda VMA frá Akureyri og úr Eyjafirði

Sex af hverjum tíu nemendum VMA eru frá Akureyri.
Sex af hverjum tíu nemendum VMA eru frá Akureyri.

Eins og undanfarin ár hefur Jóhannes Árnason, kennari við VMA, greint tölulegar upplýsingar um nemendur VMA núna á haustönn. Þetta hefur hann gert í mörg undanfarin ár og því eru hér aðgengilegar fróðlegar upplýsingar til samanburðar frá liðnum árum.

Núna á haustönn stunda 1126 nemendur nám í dagskóla í VMA, þar af eru 694 karlar (61,6%) og 432 konur (38,4%). Þetta er nánast sama hlutfall milli kynja og á sama tíma í fyrra en í samanburði við árin 2011-2014 hefur körlum hlutfallslega verið að fjölga í skólanum í ár og í fyrra.

Sem fyrr hallar á kynin í nokkrum deildum skólans. Þannig eru 98% nemenda á sjúkraliðabraut konur og 96% í hársnyrtiiðn en hins vegar snýst dæmið við í málmiðnaðargreinum, vélstjórn, rafvirkjun, byggingagreinum og bifvélavirkjun. Sömuleiðis er mikill meirihluti nemenda á íþrótta- og lýðheilsubraut karlar en hins vegar eru meira en tveir af hverjum þremur nemendum á listnámsbraut konur. Á bóknámsbrautunum, félagsfræðabraut og náttúrufræðibraut, er hlutfall kynjanna nokkuð jafnt.

Mikill meirihluti nemenda VMA kemur frá Akureyri og nágrannabyggðum í Eyjafirði eða rösklega 77%. Þar af eru um 60% nemenda VMA frá Akureyri, 26% norðan Glerárár og 34% sunnan Glerár. Um 8% nemenda koma úr Þingeyjarsýslum og tæp 7% af Norðurlandi vestra (að Siglufirði undanskildum).