Teiknaði mynd og orti ljóð á skyndiprófi í líffræði
Það var ekki beint í kortunum hjá Oddi Bjarna Þorkelssyni þegar hann var nemi á viðskipta- og hagfræðibraut VMA forðum daga að átján árum síðar yrði hann skipaður af biskupi Íslands í embætti prests í Dalvíkurprestakalli. En sú varð raunin og séra Oddur Bjarni býr nú á Möðruvöllum í Hörgárdal og þjónar ásamt séra Magnús G. Gunnarssyni í Hörgársveit, Dalvíkurbyggð, Hrísey og Grímsey. Og hann kann því vel að vera þjónandi prestur.
Oddur Bjarni er Aðaldælingur, frá bænum Hvoli. Eðlilegt skref var að fara í Framhaldsskólann á Laugum en eftir tvö ár þar hafði hann í huga að fara á fjölmiðlabraut í Fjölbrautaskólanum í Breiðholti. En vegna þess að Oddur Bjarni þekkti ekki nokkra sálu á höfuðborgarsvæðinu á þessum tíma gugnaði hann á þessum búferlaflutningum milli landshluta og fór til Akureyrar í VMA. Þrátt fyrir að hafa engan veginn ætlað sér að verða bissnesmaður fór Oddur Bjarni þó á viðskipta- og hagfræðibraut. Hann rifjar upp að hann hafi ekkert síður hellt sér í félagslífið, fyrst og fremst leiklistina, og var hann formaður Leikfélags VMA um tíma. Það er Oddi Bjarna sem öflugum manni í félagslífi VMA á árum áður því fagnaðarefni að þeim fjármunum sem safnast í því átaki sem Hollvinasamtök VMA standa nú fyrir verði varið til tækja- og búnaðarkaupa fyrir nemendur skólans, en ætlunin er að kaupa búnað í eina kennslustofu þar sem sett verður upp “bíóstofa” með öflugum skjávarpa, hljóðkerfi og stóru sýningartjaldi.
„Ég útskrifaðist sem stúdent frá VMA vorið 1992. Þetta var þroskandi og skemmtilegur tími og það er mér margt eftirminnilegt úr bæði náminu og félagslífinu. Hvorki stærðfræði né líffræði voru ofarlega á vinsældalistanum hjá mér og ég minnist þess að Jóhannes Árnason, líffræðikennarinn minn, lagði einu sinni fyrir okkur skyndipróf, sem ég vissi ekki af og kom mér því í opna skjöldu. Staðreyndin var sú að ég kunni ekkert í námsefninu og því gat ég ekki svarað einni einustu spurningu á prófinu. Í staðinn teiknaði ég mynd á prófblaðið og orti ljóð til Jóhannesar. Honum var greinilega umhugað um velferð mína því hann kom til mín í kjölfarið á prófinu og spurði mig hvort væri ekki allt í lagi með mig!“
Í kjölfarið á brautskráningu frá VMA ætlaði Oddur Bjarni í leiklistarnám en komst ekki inn í Leiklistarskólann. Í staðinn fór hann í nám í leikstjórn til Bristol í Englandi og starfaði að því loknu við leikstjórn, ásamt ýmsu öðru. En árið 2007 ákvað hann að skipta um gír og innrita sig í guðfræði. Hann vildi prófa guðfræðina í eina önn og sjá hvort námið væri eitthvað fyrir sig, sem reyndist síðan vera tilfellið. „Mér fannst þetta strax frábærlega gaman og tók fljótlega stefnuna á að taka vígslu og starfa sem prestur. Og mér líkar þetta starf afar vel. Allt sem ég hef áður gert í lífinu nýtist mér vel í preststarfinu,“ segir Oddur Bjarni. Auk preststarfsins hefur leiklistin síður en svo yfirgefið hann og einnig er hann sem fyrr virkur í hinni vinsælu níu manna hljómsveit Ljótu hálfvitunum, sem hefur nú starfað í áratug.