Er grín fyndið?
Í dag, þriðjudaginn 29. september, kl. 17 halda leikararnir Dóri DNA og Saga Garðarsdóttir fyrirlestur í Ketilhúsinu í Listagilinu undir yfirskriftinni Er grín fyndið? Þar fjalla þau um mörkin í gríni og hvað sé viðeigandi og hvað óviðeigandi. Fyrirlesturinn er sá fyrsti í röð fyrirlestra sem haldnir verða á þriðjudögum í Ketilhúsinu í vetur, eins og sl. vetur. Fyrirlestraröðin er samvinnuverkefni Listasafnsins á Akureyri, Verkmenntaskólans, Háskólans á Akureyri og Myndlistaskólans á Akureyri.
Aðgangur á fyrirlesturinn í dag er ókeypis.
Halldór Laxness Halldórsson er sviðshöfundur, leikari og uppistandari. Eftir útskrift úr MH nam hann leiklistarfræði við Listaháskóla Íslands og útskrifaðist þaðan með BFA gráðu. Síðan þá hefur hann unnið sem grínisti, handrits- og pistlahöfundur, leikari og leikstjóri.
Saga Garðarsdóttir er leikkona, handritshöfundur og fyndlistakona. Eftir að hafa lokið námi frá Menntaskólanum í Reykjavík fór hún í Listaháskóla Íslands og útskrifaðist þaðan með BFA gráðu í leiklist. Síðan hefur hún starfað sem leikkona, grínisti, pistla- og handritshöfundur.