Ferðafiskur keppir til úrslita um besta frumkvöðlafyrirtækið
Eins og greint var frá hér á heimasíðunni 6. apríl sl. tóku þrjú verkefni nemenda af viðskipta- og hagfræðibraut VMA þátt í svokallaðri Vörumessu 2017 þar sem kynnt voru frumkvöðlaverkefni 63 örfyrirtækja sem um 300 framhaldsskólanemar af öllu landinu stóðu að. Af þessum 63 verkefnum hafa nú 15 fyrirtæki verið valin í úrslit keppninnar um besta frumkvöðlafyrirtæki ársins. Eitt þessara fyrirtækja er úr VMA – Ferðafiskur. Úrslitin fara fram í Háskólanum í Reykjavík að viku liðinni, miðvikudaginn 26. apríl. Það lið sem vinnur keppnina fer sem fulltrúi Íslands í Evrópukeppni ungra frumkvöðla sem verður í Belgíu í sumar.
Ferðafiskur hefur nú þegar vakið verðskuldaða athygli. Morgunblaðið fjallið um hugmyndina 31. mars sl. Hér er mynd af bás Ferðafisks í Smáralind og hér er heimasíða verkefnisins. Eins og sjá má gengur verkefnið út á að selja frystan fisk í gegnum netið og síðan er varan afhent heim við dyr viðkomandi kaupenda. Hér má sjá þá nemendur sem að fyrirtækinu standa.
Upphaflega gekk hugmynd forsvarsmanna Ferðafisks út á að selja og heimsenda harðfisk en síðan þróaðist hugmyndin og niðurstaðan varð sú að bjóða til sölu frosinn þorsk í blokkum. Í framhaldinu fór Ferðafiskur í samstarf við Samherja og þorskpakkningar - 2,2 kg að þyngd – voru í boði fyrir kaupendur á Akureyri.
Áður en farið var af stað með þróun hugmyndarinnar unnu nemendur markaðsrannsókn í gegnum Facebook og niðurstaða svörunar úr þeirri rannsókn var á þann veg að bjóða upp á þorsk.
Miðað við góðar viðtökur má velta fyrir sér hvort ekki sé full ástæða til þess að þróa hugmyndina áfram upp í fullvaxta fyrirtæki. Hins vegar er um að ræða námsverkefni og það lifir þar til umræddum námsáfanga í frumvöðlafræði lýkur núna á vordögum.
Kennarar frumkvöðlafræðiáfangans í VMA eru Íris Ragnarsdóttir og Katrín Harðardóttir.