Bjartsýnn fyrir næsta skólaár
Skömmu fyrir páskaleyfi var kjörin ný stjórn nemendafélagsins Þórdunu með Ólaf Göran Ólafsson í formannssæti. Hann er félagslífinu og starfi Þórdunu síður en svo ókunnugur því hann var varaformaður í fráfarandi stjórn Þórdunu. Ólafur Göran segir að nú þegar sé ný stjórn Þórdunu farin að hittast reglulega, enda sé ekki eftir neinu að bíða með að skipuleggja félagslífið á komandi vetri.
Hér eru Ólafur Göran með Benedikt Barðasyni aðstoðarskólameistara VMA og Kristjáni Blæ, fráfarandi formanni Þórdunu.
„Það þurfti ekki að þrýsta á mig til þess að bjóða mig fram í formannsembættið. Mér finnst einfaldlega mjög áhugavert að takast á við þetta verkefni,“ segir Ólafur Göran þegar hann er inntur eftir því hvort lagt hafi verið hart að honum að bjóða sig fram í formanninn í stjórn Þórdunu.
„Við erum nú þegar búin að hittast og erum farin að leggja línur fyrir næsta skólaár. Við höfum líka hitt gömlu stjórnina til þess að fara yfir málin og fá góð ráð. Það er mjög mikilvægt að skipuleggja hlutina tímanlega, hvort sem um er að ræða leiksýningu eða árshátíð. Við höfum séð það í vetur hversu auðveldara það er að skipuleggja viðburðina með góðum fyrirvara. Það er ekkert fast í hendi ennþá en við erum nú þegar farin að velta vöngum yfir vali á leikriti næsta vetur og skoða möguleika með leikstjóra,“ segir Ólafur en vill ekki segja til um að svo komnu máli hvort leiksýningin verði fyrir eða eftir áramót, það ráðist að miklu leyti af því hvenær Samkomuhúsið verði laust.
Ólafur Göran hafði stefnt að því að ljúka námi í VMA um næstu jól en hann segir að í ljósi þess að hann nái ekki að sinna náminu eins vel og skyldi með formennsku í Þórdunu sjái hann fram á að hann nái ekki að ljúka náminu fyrr en að ári liðnu. Ólafur er á náttúrufræðibraut í VMA en áhugi hans er þó sem stendur ekki á að fara áfram í nám á sviði náttúruvísinda, áhuginn beinist meira í átt að kvikmyndagerð. Því hafi hann nú þegar hafið skoðun á kvikmyndaskólum erlendis með það í huga að fara í slíkt nám að loknu námi í VMA. Í því sambandi segist hann hafa staldrað sérstaklega við þekktan kvikmyndaskóla í sjálfri Mekku kvikmyndanna, Los Angeles í Bandaríkjunum.
Auk félagslífsins og námsins í VMA er Ólafur Göran skíðaþjálfari hjá Skíðafélagi Akureyrar. Hann hefur í vetur leiðbeint yngstu skíðakrökkunum í Skíðafélaginu og segist hafa haft af því mikla ánægju. Sjálfur segist Ólafur Göran hafa byrjað að æfa skíði reglulega þegar hann var sjö ára gamall og Hlíðarfjall sé alltaf jafn mikill segull á hann.
„Ég er bara mjög bjartsýnn á næsta vetur í félagslífinu í VMA. Við erum með flottan hóp áhugasamra einstaklinga í stjórn Þórdunu og í forystu félaga í skólanum og því get ég ekki annað en litið björtum augum fram á við. Félagslífið er VMA mikilvægt, skólinn er að mínu mjög vanmetinn. Þetta er flottur skóli með gott jafnvægi náms og félagslífs,“ segir Þórdunuformaðurinn Ólafur Göran Ólafsson.