Sveinspróf í pípulögnum í VMA
Síðustu annir hefur nemendahópur stundað nám í pípulögnum við VMA – og er það undir byggingadeild. Elías Örn Óskarsson, pípulagnameistari, hefur kennt og haldið utan um námið. Í síðustu viku tóku nemendurnir próf í bóklega hluta sveinsprófsins og í þessari viku var síðan komið að verklega prófhlutanum.
Þrettán nemendur taka sveinsprófið í VMA að þessu sinni og komu tveir prófdómarar frá Reykjavík til þess að leggja mat á vinnu sveinanna.
Vægi prófþátta í sveinsprófinu er sem hér segir: Skriflegt próf 100% og verklegt próf 100%. Verklegi hluti prófsins skiptist í hitakerfi (40%), neysluvatn (30%) og frárennsli (20%) og hreinlætistæki (10%) verður próftaki að ná einkunninni 5,0 úr hverjum hluta. Nánar um sveinsprófið hér.
Útbúnir hafa verið prófbásar í rými í VMA þar sem bifvélavirkjun var kennd – á milli málmiðnbrautar og vélstjórnar – og þar þreyta nemendur verklega hluta sveinsprófsins. Sjö nemendur hófu verklega prófið sitt sl. mánudag og luku því í gær, miðvikudag, og í dag hófu sex nemendur prófið og ljúka því nk. laugardag.